Presidenti i Serbisë, Aleksandër Vuçiç deklaron se ka vendosur që shteti që drejton të mos i vendosë sanksione Rusisë për pushtimin e Ukrainës. Ai mendon se vendimi për të mos vendosur sanksione ndaj Rusisë ka qenë i saktë në kohën kur është marrë dhe se është i saktë edhe tani, shkruan Aljazeera.
Duke folur për kërkesat e Bashkimit Evropian që Serbia të harmonizojë politikën e saj të jashtme si vend kandidat për anëtarësim dhe të vendosë sanksione kundër Rusisë, Vuçiç tha se Serbia duhet të qëndrojë në rrugën evropiane, por edhe të mbrojë miqtë e saj tradicionalë.
“Do të ketë vendime të tilla, ju duhet të luftoni dhe të ecni përpara, por gjëja më e rëndësishme është të mbrojmë vendin tonë dhe të ruajmë të ardhmen e fëmijëve tanë”, tha ai.
Nga ana tjetër Vuçiç duke iu drejtuar qytetarëve në Kralevë, në kuadër të vizitës së tij në rrethin e Rashit, tha se situata në botë është gjithnjë e më komplekse dhe e vështirë, sepse luftës në Ukrainë nuk i duket fundi dhe se Serbia, si një vend i vogël, duhet të gjejë vendin e saj dhe të mbijetojë.
Discussion about this post