Banorët e Laknasit kanë dalë në protestë mëngjesin e sotëm pasi kanë kundërshtuar ndërtimin e thertores nga një kompani, çështje për të cilën banorët dhe kompania janë në gjykatë prej 3 vitesh.
Ky projekt ka vazhduar në vitin 2019, por banorët tashmë kanë bllokuar punimet duke mos lejuar që punonjësit e kompanisë të vijojnë punën e tyre.
Debati është shoqëruar me tone të ashpra mes banorëve dhe policisë, duke akuzuar deputetin e PD Xhelal Mziu dhe Rakip Sulin se e kanë privatizuar këtë zonë sëbashku.
“Duan ta bëjnë stallë derrash apo lopësh nuk e di. Ne duam të marrin makinat e të mos vijnë më këtu. Kemi 3 vite që kundërshtojmë këtë gjë. Jemi akoma në gjyq në gjykatën e shkallës së parë. Janë 2 mijë pemë. Shoku Xhelal Mziu apo ndryshe krimineli Mziu e ka privatizuar këtë zonë së bashku me kryetarin e bashkisë Kamëz, Rakip Sulin.
Jemi drejtuar edhe në SPAK, nuk kemi asnjë përgjigje. Deri në datë 20 presim vendimin e gjykatës së shkallës së parë administrative. Unë nuk e di sesa pemë duan këta për ta quajtur pyll. Këtu janë 2 mijë pemë. Këta kanë ardhur të dhunojnë banorët me forcë pa pritur vendimin. Po u dhunove dhe në shpi tënde ke marrë fund, nuk ke më asgjë. Xhelal Mziu është në SPAK bashkë me Rakip Sulin. Këtu nuk është zall por pyll. Këtu vijnë pa asnjë lloj të drejte pa ruajtur asnjë lloj distance. Ishim në gjyq, avokati i tyre nuk foli asnjë fjalë, vetëm i thanë specialistit të shkonte të numëronte pemët. Nuk mund të përdorësh dhunë në shtëpi të huaj. Me 20 tetor është data e gjyqit, faza është e fundit”, u shprehën disa nga banorët.
Ndërsa përkrah banorëve janë bashkuar edhe aktivistë të tjerë të shoqatave të ndryshme, përfshirë dhe ish- avokatin e popullit, Sazan Guri.
