Në një reagim për çështjen gjyqësore ndaj deputetit Ervin Salianji, avokati dhe ish-ministri i Drejtësisë, Ylli Manjani, ka ngritur një shqetësim serioz mbi ligjshmërinë e dënimit. Sipas tij, Salianji është dënuar në kundërshtim me Kushtetutën dhe parimet bazë të drejtësisë.
Ai argumenton se nuk ka asnjë bazë ligjore që e lidh këtë rast me akuzën e “kallëzimit të rremë”. Manjani thekson se kallëzimi i rremë ndodh vetëm kur një person depoziton një referim të rremë në prokurori ose polici, gjë që nuk ka ndodhur në këtë rast. Gjithashtu, ai paralajmëron kundër konfuzionit mes kallëzimit të rremë dhe dëshmisë së rreme, të cilën disa e përdorin për të justifikuar dënimin. Në qëndrimin e tij të qartë, Manjani e quan këtë vendim një shkelje të rëndë të të drejtave kushtetuese dhe ndërkombëtare. Ai e mbyll reagimin e tij me bindjen se dënimi është i paligjshëm dhe i padrejtë.
“Askush nuk mund të dënohet pa ligj! Lexoni nenin 29 të Kushtetutës po të doni! Ervin Salianji është i dënuar PA LIGJ! Nuk ka top që të ma luajë këtë konkluzion. Kallëzimi i rremë quhet vetëm referimi që bëhet para prokurorit ose policisë. Kujdes, nuk duhet ngatërruar as me dëshminë e rreme para prokurorit, që shpesh e përdorin qëllimisht për konfuzion ata që janë në favor të këtij dënimi. Edhe ai që quhet “fabrikim provash”, që të jenë kallëzim i rremë duhet që, provat e fabrikuara pra, të jenë depozituar bashkë me kallëzimin në prokurori ose policinë gjyqsore. Janë këto të fundit që konstatojnë nëse provat e paraqitura janë të rreme ose jo dhe, vetëm në këtë proces mund të konkludohet jemi apo jo para kallëzimit të rremë“, shkruan avokati Manjani.
“Ky është ligji penal dhe procedural penal i shkruar. Kjo është praktika gjyqsore e zbatuar deri më sot. Ervin Salianji nuk ka kallëzuar askënd as në prokurori e as në policinë gjyqsore. Nuk ka depozituar asnjë provë të fabrikuar në asnjërën prej institucioneve ku depozitohet kallëzimi. Për pasojë ska se si të ketë kallëzim të rremë. Mund të ishte ndoshta në kushtet e shpifjes publike, ose në kushtet e mos kallëzimit të krimit, nisur nga fakti se provat e bëra publike tregonin vepra penale. Por në asnjë rrethanë kallëzim i rremë. Kam qenë dhe i mbetem i këtij mendimi. Në këto kushte ai quhet i dënuar PA LIGJ, në shkelje të rëndë të Kushtetutës dhe të Konventës Europiane të të Drejtave të Njeriut”, shton ish-ministri i Drejtësisë.
Lexo edhe:
- Denoncoi vëllain trafikant të ish-ministrit Xhafaj, Gjykata e Lartë merr vendim për Ervin Salianjin
- Flet avokati: Padrejtësia mbi Salianjin do të kthehet në një shuplakë për drejtësinë shqiptare
- Gjykata e Lartë e la në burg, reagon Salianji: Do luftoj deri në fund, personalisht zgjedh betejën dhe jo qurravitjet!
- Vendimi i GJL për Salianjin/ PD: I burgosur politik që mbahet peng nga partia-shtet
Discussion about this post