Heqja e mësimit me turne është mirëpritur nga të gjithë prindërit, por ka ende pikëpyetje që lidhen me zhvillimin e mësimit. Drejtorja e Politikave të Zhvillimit të Arsimit, Zamira Gjini, ka treguar gjatë një interviste televizive si do të veprohet me nxënësit, shkollat e të cilëve janë dëmtuar nga tërmeti.
Ajo tha së nxënësit e këtyre shkollave do të dërgohen në një tjetër shkollë, pra dy shkolla do bëjnë mësim në një godinë për një farë kohe.
“Shkollat janë gati që nxënësit të vazhdojnë mësimin rregullisht në klasa, në orë 45 minutëshe, sipas orarit të përcaktuar nga mësuesit. Është ngjarje e rëndësishme se na u desh për shumë kohë të shikonin gjatë muajit shtatorit se si vijon situata e përhapjes së virusit dhe bërjes së vaksinës nga mësuesit, dhe të merrnim këtë vendim…
Janë pak shkolla në qytetin e Tiranës, Durrësit e Krujës, që për shkak të tërmetit po rikonstruktohen dhe po ndërtohen shkolla të reja. Do të duhet që dy shkolla ta bëjnë mësim në të njëjtën godinë. Është e përkohshme. Për pak muaj, nxënësit do të kthehen në shkollat e tyre”, tha ajo, por pa sqaruar sa muaj do të zgjas ky lloj skenari.
