Mbledhja e grupit parlamentar të PD sot është shoqëruar me një sërë debatesh mes mbështetësve të Berishës dhe kryedemokratit Basha. Në debat e sipër, deputeti Luan Baçi tha se, Basha po sillet ndryshe me ata që kanë marrë pjesë në “Foltoret” e Berishës, por që kjo nuk do të zgjasë dhe shumë për shkak se 1500 firmat që duhen për të mbledhur Kuvendin, janë pothuajse gati.
Por, kreu i PD Lulzim Basha është shprehur i prerë se për sa kohë të jetë ai kryetar, shpallja ‘non-grata’ e Berishës nuk do hidhet me votë në asnjë forum të selisë blu. Ndër të tjera ai, ka deklaruara se nuk do lejojë asnjë akt që çon në izolimin e partisë nga SHBA, pasi sipas tij kjo do të përkthehej në vdekje të saj.
Kryedemokrati ka vlerësuar kontributin e Sali Berishës, por thekson se tashmë ai po përpiqet të lidhë vendimin e qeverisë amerikane me shpalljen e tij ‘non- grata’, me fatin e Partisë Demokraktike. Sipas Bashës, plani i Berishës synon ta kthejë Partinë Demokratike në një bunker anti-amerikan për interesin e tij. Sipas tij , lëvizjet që po bën Berisha e izolojnë PD dhe e shkatërrojnë. “Nuk do të pranoj e lejoj akte që çojnë në izolimin e Partisë Demokraitke nga aleati ynë strategjik dhe mirëbërësi më i madh në histori i Shqipërisë, Kosovës dhe kombit shqiptar, që janë SHBA. Izolimi nga SHBA është vdekja e Partisë Demokratike. Rrjedhimisht është vdekja për një periudhë jo të shkurtër e shpresës së shqiptarëve për rrotacionin e pushtetit dhe normalizmin e demokracisë në vend. Orientimi perendimor, proamerikan, euroatlantik e proeuropian janë për Partinë Demokartike me shumë se përcaktime ne statutin dhe dokumentet e saj. Janë identiteti i saj, kanë lindur në një orë me të, janë e do të jenë ADN-ja e saj”, ka deklaruar ai.
Ndërkohe, Agron Gjekmarkaj tha se Berishizmi përfaqëson të kaluarën, duke shtuar se ish-kryeministri po përdor një gjuhë të vjetër dhe denigruese. Deputetët Albana Vokshi dhe Edmond Spaho kanë kërkuar mbledhjen e anëtarësisë për të hedhur në votë përjashtimin e Berishës nga Partia Demokratike.
Kujtojmë se, që kur Basha vendosi largimin e Berishës për shkak të shpalljes ‘non-grata’ nga SHBA, në PD kanë nisur përplasjet e forta dhe përçarjet. Ndërsa kriza është thelluar që nga momenti kur Berisha nisi të zhvillojë “Foltore” në çdo qytet për të mbledhur firmat e nevojshme, për ngritjen e Kuvendit, i cili do mund të sjellë më pas dhe shkarkimin e Bashës.
