Mbrëmjen e djeshme, Sarajet e Toptanëve janë përfshirë nga flakët.
Mësohet se vatrat e para janë regjistruar në katin e parë të godinës. Por duke qenë se strukturat e brendshme janë me bazë druri, flakët janë përhapur me shpejtësi, duke u ngjitur deri në katin e dytë.
Zjarrfikëset, janë paraqitur me shpejtësi në vendngjarje dhe kanë bërë të mundur neutralizimin dhe izolimin e flakëve. Por pas ikjes së tyre, një vatër tjetër është riaktivizuar, kësaj here, nga kati i dytë i godinës që është monument kulture. Është dashur ndërhyrja e banorëve të zonës dhe kalimtarëve të rastit, që me mjete rrethanore e kanë shuar zjarrin.
Sipas burimeve, paraprakisht dyshohet se zjarri është i qëllimshëm. Por godina nuk ka kamera sigurie, e tanimë, autoritetet po punojnë për sekuestrimin e kamerave të bizneseve të zonës, për të bërë të mundur identifikimin dhe arrestimin e autorit/ve.
