Policia e Tiranës ka finalizuar një tjetër operacion hetimor për zbardhjen e rasteve të vjedhjeve në banesa dhe lokale, duke identifikuar tre autorë të dyshuar. Dy prej tyre janë vënë në pranga, ndërsa një 21-vjeçar është shpallur në kërkim.
Të arrestuarit janë identifikuar si 20-vjeçari, Enea Duçi dhe 33-vjeçari, Armando Kumani.
Ndërkohë është shpallur në kërkim 21-vjeçari, Erion Guce. Duçi dhe Guce kanë vjedhur para dhe sende me vlerë, në 1 banesë dhe në 2 lokale. Kumani dyshohet se dje ka vjedhur një shumë parash në një banesë në fshatin Arbanë.
Njoftimi i policise
Në kuadër të hetimeve të kryera nga Komisariati i Policisë Nr. 6, në bashkëpunim me Komisariatin Nr. 2, është bërë e mundur dokumentimi i autorësisë në katër raste vjedhjesh. Konkretisht:
Në pranga ka rënë shtetasi E. D., 20 vjeç, dhe është shpallur në kërkim shtetasi E. G., 21 vjeç. Ata dyshohen se gjatë periudhës maj-qershor kanë kryer vjedhje në një banesë dhe në dy lokale, duke marrë para dhe sende me vlerë.
Gjithashtu, është arrestuar shtetasi A. K., 33 vjeç, i dyshuar për vjedhjen e një shume parash në një banesë në fshatin Arbanë, ngjarje e ndodhur një ditë më parë.
Gjatë operacionit janë sekuestruar bizhuteri, një shumë lekësh të dyshuara të vjedhura, si dhe një automjet.
Policia po vijon punën për kapjen e 21-vjeçarit të shpallur në kërkim, si dhe për dokumentimin e plotë të rasteve të tjera që mund të jenë kryer nga këta shtetas.
Discussion about this post