Zbardhen EMRAT, kush janë dasmorët që rrahën Shpat Kasapin në dasmë

Janë zbardhur detaje të reja nga ngjarja e regjistruar në Kosovë, ku këngëtari Shpat Kasapi dhe vëllai i tij, Albin Kasapi u dhunuan fizikisht nga dasmorët dhe dhëndri i dasmës, ku ai ishte i ftuar për të kënduar. Ngjarja ndodhi në restorantin “Grand Events” në fshatin Shkabaj, në aksin rrugor Prishtinë–Mitrovicë.

Mediat kosovare raportojnë se personat që dhunuar vëllezërit Kasapi janë shtetasit Feim Kicaj (rreth 62 vjeç), Bledar Kicaj (36) dhe Blerim Kicaj (29). Me vendim të prokurorit, Feim Kicaj është ndaluar për 48 orë, ndërsa dy të tjerët janë liruar në procedurë të rregullt.

Sherri dyshohet se nisi pas vonesës së këngëtarit në dasmë, ndërkohë që burime jozyrtare pretendojnë se ai kishte shkuar edhe në gjendje të dehur. Pasi situata degjeneroi, dhëndri dhe disa të ftuar të tjerë kanë ushtruar dhunë ndaj Kasapit dhe vëllait të tij, duke i goditur brutalisht.

Policia ndërhyri dhe i shoqëroi agresorët dhe të dhunuarët në Polici për të sqaruar ngjarjen. Nga përplasja, njëri prej vëllezërve Kasapi ka pasur nevojë për ndihmë mjekësore.

Sipas raportimeve mediatike, e lënduar kishte mbetur edhe nusja në dasmë, ku dyshohet se shkaktari kishte qenë Shpat Kasapi. Autoritetet në Kosovë kanë nisur hetimet për të zbardhur motivet dhe rrethanat e plota të incidentit.

Shpat Kasapi në një reagim në rrjetet sociale nuk i mohoi lajmet, por u kërkon mediave që të mos e ekzagjerojnë shumë. Ai thotë se është mirë me shëndet dhe se sihte vetëm një keqkuptim me dasmorët dhe asgjë për t’u shqetësuar,.

“Të dashur miq, unë jam mirë me shëndet, falë Zotit. Ju lutem mos e ekzagjeroni shumë lajmin, ishte një keqkuptim me dasmorët, asgjë tjetër për t’u shqetësuar,” – shkruan këngëtari në një postim në InstaStory.

Shpat Kasapi gjatë një interviste të dhënë vite më parë, deklaronte se ishte i dhënë pas sherrit fizik. Ai ishte shprehur se në moshën 25-26 vjeçare ka qenë një person i dhunshëm.

I pyetur nga prezantuesja e emisionit, ai pranoi se kishte qëlluar ish-të dashurën e tij pasi e kishte kuptuar se ajo e tradhtonte.