Mediat në Kosovë kanë zbardhur ekzaminimin mjekësor të të moshuarës që u dhunua nga infermierja Aurora Pelaj në shtëpinë e të moshuarve në Pejë. Në raportin mjekësor thuhet se nga ekzaminimi ka rezultuar se e moshuara ka pasur lëndime trupore edhe më herët. Gjithashtu sipas mjekëve e moshuara nuk është në gjendje të flasë për atë çka i ndodhi, kështu që u vendos që dëshmia e saj të merret në një situatë tjetër më vonë.
Infermierja Aurona Pelaj e cila dhunoi të moshuarën Minire Nura në qendrën e pleqve në Pejë, do të qëndrojë një muaj në paraburgim. Gjykata themelore ka marrë të njëjtën masë edhe për dy koleget e saj, të përfshira në sulm, të cilat filmuan episodin dhe nuk ndërhynë.
Të tre të pandehurat do të qëndrojnë në paraburgimin e burgut të Lipjanit. Dje, e enjte, 3 nëntor institucionet e drejtësisë në Kosovë caktuan një mjek psikiatër për të ekzaminuar gjendjen e së moshuarës pas dhunës së ushtruar mbi të.
Lexo edhe: Dhunimi i të moshuarës në Kosovë, pronari i azilit kërkon ndjesë publike
Referuar zyrtarëve ky vendim është ndërmarrë për të përcaktuar nëse ajo është në gjendje të dëshmojë për ngjarjen. Ndërkohë, autoritetet vendase po vazhdojnë hetimet për të verifikuar nëse ka pasur edhe raste të tjera të dhunës në shtëpinë e pleqve, “Orenda” në Pejë. Vetëm një ditë pas publikimit të videos së rëndë të këtij akti, aktorja Kaltrina Zeneli e cila ishte e para që shpërndau videon në rrjetet sociale ka marre kërcënime për jetën.
Familjarët e të moshuarës e tërhoqën atë nga Shtëpia e Pleqve menjëherë pas publikimit e videos, duke paralajmëruar se do të ndjekin të gjitha rrugët ligjore. Për këtë rast të rëndë pati reagime të ashpra nga drejtues të shtetit e politikës, shoqëria civile dhe qytetarë në Kosovë dhe në Shqipëri.
Discussion about this post