Detaje të reja janë zbuluar për 52-vjeçarin e identifikuar si Thanas Bako alias Athanasios Bako, i cili përmes një kompanie “Real Estate” pastronte paratë e trafikantëve të kokainës në Holandë e Belgjikë.
Bako u arrestua në Greqi pas një operacioni të gjerë të drejtuar nga Europol, ndërsa ishte nën hetim prej muajsh.
Sipas informacioneve që raportohen, rreth 6 muaj më parë autoritetet holandeze kanë zbuluar në aplikacionet e komunikimit të një grupi trafikantësh kokaine, një kontakt me 3 gërma, i cili kryente pastrimin e parave.
Ky kontakt përdorte një metodë alternative të transferimit të parave, me ndërmjetësimin e personave, si sistemi hawala, dhe mënyra tjetër e trajtimit ishte me një “korrier” cashi për të mbledhur dhe dorëzuar paratë, i cili çdo ditë e informonte atë për “bilancin” e arkëtimeve dhe pagesave.
Policia holandeze i kreu këto hetime në kuadër të operacionit të koduar “Klaver”, duke arritur të zbulojë se pas kontaktit me 3 gërma fshihej emri i Thanas Bako alias Athanasios Bako, 52 vjeç me shtetësi shqiptare e kombësi greke, lindur në Sarandë, Shqipëri dhe banues në Glifadha, Greqi.
Në bazë të komunikimeve në aplikacionet Encrochat, Sky EÇ dhe Anom, u zbulua veprimtaria e Bakos në periudhën Qershor 2020 – Maj 2021, ku përllogaritet të jenë qarkulluar rreth 250 milionë euro. Policia greke, e cila ka nisur gjithashtu hetim ndaj Bakos, ka zbuluar se kompania e tij Real Estate, në të cilën Bako zotëron 99 % të aksioneve, ka në pronësi të paktën 13 apartamente në zonën e Dafnit dhe Ilioupolit.
Kontrollet në banesë zbuluan valuta të 9 llojeve të ndryshme me vlerë në total rreth 16.000 euro, ndërsa i janë zbuluar llogari bankare në vlerën rreth 70 mijë euro.
Në banesë gjithashtu ju sekuestruan edhe 2 ora luksoze me vlerë rreth 100 mijë euro.
Discussion about this post