Palët në Partinë Demokratike ndahen mes primareve dhe sondazheve. “BalkanWeb” shkruan se përballë deputetit Gazment Bardhi, me të cili u takua dje, kryetari i Këshillit Kombëtar të PD-së, Edi Paloka ka kërkuar kandidatët e mbështetur prej grupit të Alibeajt, të bëhen pjesë e primareve që po organizon PD. Paloka ka premtuar një proces transparent e të ndershëm në këto primare, në fund të të cilit, do të nominohet si kandidat për kryetar bashkie ai që ka marrë më shumë vota. Por Bardhi e ka kundërshtuar këtë ide. Sipas tij, futja e të gjithë kandidatëve në primare do ta çajë PD-në më shumë sesa është sot.
Si zgjidhje ai ka propozuar përzgjedhjen e emrave potencialë për kryebashkiakë dhe hedhjen e tyre në sondazhe lokale. Kjo alternativë është pëlqyer dhe nga dy aleatët e PD-së, Agron Duka e Dashamir Shehi, por kryedemokrati Sali Berisha është shprehur se janë të kushtueshëm.
Vetë Berisha ka ndarë dhe kalendarin e primareve që do të përfundojë brenda datës 4 dhjetor, ditë kur dhe pritet të mbahen votimet. Si afat për mbylljen e regjistrimeve për kandidatët që do të marrin pjesë, është lënë 6 nëntori dhe për pasojë, kandidatët do të kenë vetëm dy javë kohë për të bërë fushatë. Deri në 6 nëntor do të zhvillohen negociata me aleatët për evidentimin e kandidatëve që do të marrin pjesë në primare. Më pas Partia Demokratike do të zhvillojë një proces seleksionues për të gjithë kandidatët që duan të bëhen pjesë e primareve. Më datë 13 nëntor pritet të bëhet prezantimi i kandidatëve që kanë shprehur interes për të qenë në garë për bashkitë. Ndërsa më 4 dhjetor do t’i nënshtrohen votimit nga anëtarësia. Bashkitë që pritet të mbyllen të parat do të jenë Tirana, Durrësi dhe Elbasani, të cilat janë përjashtuar nga datat e mësipërme për shkak të rëndësisë që kanë. Kandidatët për këto tre bashkia do të zyrtarizohen më herët.
Discussion about this post