Është zbardhur takimi që presidenti Ilir Meta zhvilloi me presidenten e Komisionit Europian, Ursula von der Leyen pa praninë e mediave.
Meta shkruan në Facebook se ka besim te BE dhe KE për përparimin e marrëdhënieve, ndërsa shtoi se intensifikimi i përpjekjeve të dyanshme është çelësi i suksesit të përbashkët.
“Kënaqësi të takohesha sot me Presidenten e KE, Sh.S.Znj. Ursula von der Leyen. Kemi besim tek Bashkimi Europian dhe mbështetja e Komisionit për përparimin e marrëdhënies kontraktuale ndërmjet nesh. Me këtë synim, intensifikimi i përpjekjeve të dyanshme ndaj sfidave të brendshme dhe të jashtme është kyç i suksesit të përbashkët”, shkruan Meta.
Aktualisht Von der Leyen ndodhet në Krujë për përurimin e shkollës “Korb Muça” dhe Kopshtit “Europa”, të cilat u rindërtuan me fondet e BE -së në kuadër të programit EU4Schools pas tërmetit tragjik të vitit 2019.
Presidentja shoqërohet nga kryeministri Rama, ku pritet që në vazhdim të ketë një konferencë të përbashkët mes tyre.
