Është zbardhur vendimi i Kolegjit Penal të Gjykatës së Lartë për të mos pranuar rekursin e ish-ministrit Lefter Kokës për të dalë nga burgu dhe të gjykohet me masën e sigurisë “arrest shtëpie”.
Në arsyetim, Gjykata e Lartë thotë se Lefter Koka ka marrë njëherë përgjigje nga Gjykata e Apelit, e cila e la në burg, dhe rrjedhimisht sipas tyre ajo nuk mund të rishikojë të njëjtën kërkesë.
“Kolegji vlerëson se kërkuesi ka paraqitur si shkaqe rekursi të njëjtat pretendime si në ankimin e paraqitur përpara gjykatës së apelit, pretendime për të cilat ai ka marrë përgjigje të arsyetuar nga gjykata e apelit. Është momenti për tu vënë në pah se, Gjykata e Lartë është vetëm një gjykatë ligji, e cila shqyrton pretendimet e palëve për zbatim të gabuar të ligjit material apo procedural, ose kur vendimi i ankimuar vjen në kundërshtim me praktikën e Kolegjit Penal ose të Kolegjeve të Bashkuara të Gjykatës së Lartë. Pra, kjo gjykatë nuk është një gjykatë fakti dhe pretendimet për vlerësim të gabuar të provave janë një çështje që del jashtë juridiksionit ekskluzivisht ligjor të Gjykatës së Lartë“, thekson Gjykata e Lartë në vendim.
Më tej, Gjykata e Lartë shpjegon se me ndryshimet e Kodit Penal, rezulton se rekursi duhet të përmbajë shkaqet për të cilat kërkohet prishja apo ndryshimi i vendimit, si dhe argumentet që mbështesin pretendimin se ekzistojnë shkaqe për rekurs sipas parashikimeve të nenit 432 të këtij Kodi.
Në fund, Gjykata thotë se rekursi i Kokës nuk pranohet dhe se ky i fundit do të qëndrojë në burg. Kujtojmë se Koka ndodhet në pranga pasi akuzohet për veprat penale “Shpërdorim detyre”, kryer në bashkëpunim, “Korrupsioni pasiv i funksionarëve të lartë shtetëror ose të zgjedhurve vendor” ,“Korrupsioni pasiv i funksionarëve të lartë shtetëror ose të zgjedhurve vendor” dhe “Pastrimi i produkteve të veprës penale apo veprimtarisë kriminale”. Koka rezultoi i përfshirë në aferën e inceneratorët të Fierit, për të cilin ra në pranga dhe ish deputeti socialist Alqi Bllako.
Discussion about this post