Qeveria ka vendosur të kalojë në pronësi të saj 80 hektarë në Durrës për ndërtimin e projektit më të ri në atë qytet. Përmes një vendimi të publikuar ditën e sotme në fletoren zyrtare, këshilli i ministrave ka njoftuar transferimin pronave shtetërore nga bashkia Durrës te ministria e financave dhe Ekonomisë për projektin investues Strategjik “Marina dhe Jahtet e Durrësit”.
Sipërfaqja e transferuar në total është 80.9 ha, sipërfaqe që do t’i hiqet administrimit nga Autoriteti Portual Durrës, për t’i kaluar ministrisë së Financave. Kështu, vihet në dispozicion pasuritë e paluajtshme shtetërore pas nënshkrimit të marrëveshjes së bashkëpunimit ndërmjet palës shqiptare dhe shoqërisë “Symphony Real Estate Development” sh.p.k..
“Me propozimin e ministrit të financave dhe ekonomisë, këshilli i ministrave Vendosi: Transferimin në fondin e pasurive të paluajtshme për mbështetjen e investimeve strategjike (FPPMIS), i cili administrohet nga ministria përgjegjëse për ekonominë, të pasurive të paluajtshme shtetërore në zonën kadastrale nr. 8514, Bashkia Durrës, me sipërfaqe totale 80.9 (tetëdhjetë pikë nëntë) ha, të përcaktuara në shtojcën 1 dhe në planvendosjen, që i bashkëlidhen këtij vendimi dhe janë pjesë përbërëse të tij”, thuhet në vendim. Në këtë marrëveshje do të përcaktohet forma e pjesëmarrjes së shtetit në investim dhe mënyra e vënies në dispozicion të pronës shtetërore.
Discussion about this post