Policia e Shkodrës ka zbardhur ngjarjen e regjistruar të mërkurën në Shkodër, ku u grabitën mbi 100 mijë euro në banesën e mjekes infeksioniste Zhaneta Doçi, teksa kjo e fundit së bashku me bashkëshortin e saj nuk ndodheshin në shtëpi.
Autoritetet policore bëjnë me dije se dy autorët e dyshuar të ngjarjes janë Frederik Shkambi, 27 vjeç, dhe Mikel Gjoni, 34 vjeç, të dy banues në Shkodër, të cilët janë shpallur në kërkim.
Ata akuzohen për veprën penale “Vjedhja” me pasoja të rënda, kryer në bashkëpunim, si dhe për “Prodhimin dhe shitjen e narkotikëve” në rastin e 34-vjeçarit.
Gjatë kontrollit që uniformat blu kanë ushtruar në banesën e Frederik Shkambit, kanë gjetur 3 maska, 1 kapuç, 5 celularë, 5 palë targa dhe sende të tjera të kundërligjshme, ndërsa gjatë kontrollit në banesën e Mikel Gjonit kanë gjetur një sasi lënde narkotike kanabis sativa.
Burime bëjnë me dije se shuma e parave është grabitur gjatë kohës që pronarët, burrë e grua, nuk kanë qenë në banesë në lagjen “Qemal Stafa”, teksa kur kanë konstatuar vjedhjen, ata kanë shkuar dhe kanë bërë denoncim në Polici.
Shumën prej mbi 100 mijë eurosh, ata e mbanin në një dollap të dhomës së gjumit. Nga pamjet e kamerave të sigurisë shihet se autori, i maskuar, i është afruar në banesë me biçikletë, dhe po me të është larguar, e ka hapur derën me çelës, ka hyrë brenda dhe krejt i qetë ka mundur të marrë shumën e konsiderueshme të parave.
Policia vijon punën për kapjen e autorëve të dyshuar dhe materialet do t’i kalojnë Prokurorisë për veprime të mëtejshme.
Discussion about this post