Gjykata e Krujës ka lënë prapa hekurave 51- vjeçarin, i cili vrau me thikë pak ditë më parë bashkëshorten e tij 45-vjeçare.
Artan Ismalaja qëlloi për vdekje brenda automjetit bashkëshorten, Klarita Ismalaja, me të cilën kishte dy fëmijë, përkatësisht 22 dhe 17 vjeç.
Gjyqtari i Krujës vendosi masën e sigurisë “Arrest me burg” për 51-vjeçarin brenda ambienteve të Spitalit të Traumës ku ndodhet pasi tentoi vetëvrasjen.
Mësohet se 51-vjecari ka shprehur pendesë për krimin ndaj së shoqes dhe njëkohësisht nënës së dy djemve të tij, duke mos kundërshtuar masën e sigurisë të vendosur nga Gjykata.
DËSHMIA
Gjatë seancës, 51-vjeçari Artan Ismalaja, banues prej vitesh në Tiranë dhe me origjinë nga Kruja, ka shprehur pendesë për krimin e rëndë.
Ai tha se vrasja kishte ndodhur për shkak të debateve për shitjen e një prone, e konfirmuar më herët edhe nga djali i madh i tyre, duke shtuar se ishte penduar që në momentin e parë dhe për këtë arsye kishte tentuar vetëvrasjen.
Mësohet të jetë shprehur shkurtimisht 51-vjeçari para togave të zeza që improvizuan dhomën e spitalit si sallë gjyqi për t’i komunikuar atij masën e sigurisë.
HETIMET
Prokuroria e Krujës vijon me intensitet hetimet për zbardhjen dhe dokumentimin e plotë të ngjarjes, ndërsa mësohet se shkak për krimin në familje të jetë bërë një konflikt për shitjen e një prone.
Burime për gazetën “Panorama” bëjnë me dije se konflikti mes tyre kishte nisur pasi çifti do të shiste shtëpinë e prindërve të viktimës, pasi familja e vajzës do të transferohej në Tiranë.
Kjo ishte edhe arsyeja që çifti Ismalaj udhëtonte atë ditë (06.07.2021) nga Tirana drejt fshatit Bubq, vend në të cilin ndodhi edhe krimi makabër.
NGJARJA
Krimi i rëndë që tronditi zonën e Fushë-Krujës u regjistrua paraditen e së martës së shkuar. Artan Ismalaja së bashkua me gruan e tij kishin udhëtuar drejt zonës për çështjen e një prone që ata do të shisnin.
Ndërsa kishin ndaluar pranë një zone të pabanuar, 51-vjeçari qëlloi disa herë me thikë bashkëshorten e tij duke i shkaktuar vdekjen e menjëhershme dhe më pas ka tentuar të vrasë veten, duke u qëlluar me thikë në pjesën e qafës.
Roja i objektit që iu ofrua makinës vuri re praninë e gjakut, duke lajmëruar menjëherë Policinë. Ndërsa forcat e Rendit mbërritën në vendngjarje, ambulanca transportoi drejt Spitalit të Traumës në gjendje të rëndë burrin e plagosur./Panorama.al
