Deputeti i Partisë Socialiste, Alqi Bllako pak momente më para ka dorëzuar zyrtarisht në Kryesinë e Kuvendit, kërkesën e tij për dorëheqjen nga mandati i deputetit. Shkresa zyrtare ka mbërritur në kuvend para se të zhvillohej mbledhja e Këshillit të Mandateve.
Në letrën e siguruar, Ballko shkruan se ka vendosur të jetë në dispozicion të drejtësisë i bindur se pafajësia e tij do të vërtetohet.
“Me bindjen e plotë se në fund të këtij procesi do të provohet pafajësia ime, integriteti dhe ndershmëria në detyrën e ushtruar me këtë akt personal vihem në dispozicion të drejtësisë duke gjykuar t’i hap rrugën të pakushtëzuar proceseve të mëtejshme të organeve të drejtësisë”- shkruan Bllako.
Ndaj Bllakos, rezultojnë disa akuza lidhur me kontratën e inceneratorit të Fierit. Alqi Bllako akuzohet se ka shpërdoruar detyrën e tij si sekretar i Përgjithshëm i ministrisë së Mjedisit, duke ndryshuar dy herë kontratën dhe duke bërë shkelje të tjera që i kanë shkaktuar një dëm prej qindra milionë lekësh buxhetit të shtetit.
Tashmë pritet që kryesia e Kuvendit të miratojë vendimin për heqjen e mandatit të Alqi Bllakos dhe më pas Prokuroria e Posaçme (SPAK) mund të bëjë arrestimin e tij.
Discussion about this post