Mbi 1 mijë e 600 qytetarë mes tyre 51 fëmijë të Komunës së Deçanit dhe fshatrave përreth u detyruan të kërkojnë ndihmë mjekësore në Qendrën Kryesore të Mjekësisë Familjare “Adem Ukëhaxhaj”, për shkak të helmimit.
Tashmë nga analizat e kryera nga IKSHPK-ja, pas marrjes së mostrave të ujit janë identifikuar disa baktere koliforme dhe E.coli. Gjithashtu edhe nga mostrat e dërguara për testim jashtë vendit, rezultatet kanë nxjerrë se pacientët janë të infektuar me dy lloje të E.Coli dhe një virus i quajtur Norovirus.
Ndërkohë që deri tani për fatkeqësinë që ka ndodhur në Deçan është arrestuar një zyrtar i Agjencisë Kosovare të Pyjeve, për shpërdorim detyre, si dhe një person tjetër, i cili dyshohet se ka fikur kamerat e sigurisë në grykën e Deçanit.
Në lidhje me situatën, kryetari i Komunës së Deçanit në Kosovë, Bashkim Ramosaj ka thënë se gjendja në vend po shkon drejt normalizimit, dhe se gjendja emergjente pritet të përfundojë së shpejti.
Komuna e Deçanit, në bazë të Ligjit për Vetëqeverisje Lokale dhe Ligjit për Parandalimin dhe Sëmundjeve Ngjitëse të Statutit të komunës së Deçanit, mori vendimin që të shpallet gjendje emergjente në tërë territorin e kësaj komune. Prej më shumë se një jave, komuna e Deçanit nuk mund të konsumojë ujin e pijshëm të zonës.
