Me mbylljen e sezonit për kultivimin e kanabisit, trafikantët shqiptarë duket se kanë ndryshuar strategji, pasi nga mbjellja e drogës në parcela të hapura, po e kultivojnë atë brenda në shtëpi.
Strategjia e “shtëpive të barit” që përdoret gjerësisht nga bosët e drogës në Angli, tashmë është kthyer aktivitet biznesi edhe në Shqipëri. Një rast i tillë është zbuluar mëngjesin e kësaj të enjteje në Tiranë, ku një operacion i koduar “Aroma” ka vënë në pranga 2 trafikantë droge. Bëhet fjalë për personat e identifikuar me iniciale A. A., 28 vjeç dhe Xh. I., 54 vjeçe, të cilët kanë bashkëpunuar, duke përshtatur ambientin e një banese, me aparatura që shërbejnë për tharjen dhe prodhimin e lëndëve narkotike, të cilën e paketonin dhe e bënin gati për shpërndarje me doza për përdorues të ndryshëm.
Në pranga ka rënë edhe personi i identifikuar si H. T., 50 vjeç, i cili kishte detyrë të ruante ambientin e jashtëm të banesës dhe të raportonte të dy “shefat” në rast se shikonte lëvizjeve të dyshimta.
Gjatë kontrollit të banesës u gjetën dhe u sekuestruan në cilësinë e provës materiale 27 kg lëndë e dyshuar kanabis, një armë zjarri pistoletë, municion luftarak, aparatura që shërbejnë për tharjen dhe prodhimin e lëndës narkotike, doza me lëndë të dyshuar kokainë, një peshore elektronike dhe një automjet.
Pritet që të arrestuarit të përballen me akuzën për veprën penale “Prodhimi dhe shitja e narkotikëve” e kryer në bashkëpunim dhe “Armëmbajtja pa leje”.
