Presidenti i Ukrainës, Volodymyr Zelensky, ka reaguar sërish lidhur me situatën në të cilën ndodhet vendi i tij pas 10 ditësh sulm nga Rusia, ndërsa sot është arritur një armëpushim prej 7 orësh mes palëve.
Zelensky është shprehur i bindur se lufta do të përfundojë shpejt, ndërsa shtoi se qytetarët që janë larguar nga vendi mund të kthehen në Ukrainë.
“Jam i sigurt që shpejt do të jemi në gjendje t’ju themi njerëzve tonë: kthehuni! Kthehuni nga Polonia, Rumania, Sllovakia dhe gjithë vendet tjera. Kthehuni sepse s’ka më rrezik”, ka thënë Zelensky.
Ndërkohë ai është treguar i ashpër ndaj liderëve të NATO të cilët refuzuan vendosjen e një zone ndalim-fluturimi mbi qiejt e vendit të tij.
“Që nga sot, të gjithë njerëzit që do të vdesin, do të vdesin për fajin tuaj, për shkak të dobësisë tuaj. Samiti i NATO që u mbajt sot ishte një samit i dobët, konfuz. Ishte një samit që tregoi se jo çdokush e konsideron luftën për lirinë në Europë si qëllimin kryesor”, tha Zelensky.
Ndër të tjera ai është shprehur se të gjitha agjencitë inteligjente të vendeve të NATO janë në dijeni të planeve të armikut, pasi të gjitha kanë konfirmuar se Rusia do të vijojë ofensivën.
Discussion about this post