Presidenti i Ukrainës, Volodymyr Zelenskyy, u ka thënë sot liderëve të vendeve të Grupit të Shtatë (G7) se presidenti Vladimir Putin ka ende “hapësirë për përshkallëzim” pas dy ditësh sulmesh të shtuara nëpër të gjithë Ukrainën. Udhëheqësi rus “është tani në fazën e fundit të mbretërimit të tij dhe është një kërcënim për të gjithë ne”, tha Zelenskyy gjatë fjalimit me video drejtuar udhëheqësve të G7.
Ai gjithashtu u bëri thirrje udhëheqësve të G7 që ta ndihmojnë Ukrainën që të rrisë aftësinë e saj për mbrojtje ajrore në mënyrë që të frenohet Rusia.
“Kur Ukraina të marrë një sasi të mjaftueshme të sistemeve moderne dhe efektive të mbrojtjes ajrore, elementi kryesor i terrorit të Rusisë, sulmet me raketa, do të pushojë së funksionuari.”
Presidenti ukrainas falënderoi kancelarin e Gjermanisë, Olaf Scholz, për përshpejtimin e dorëzimit të sistemit të mbrojtjes ajrore IRIS-T dhe presidentin e SHBA, Joe Biden, për dërgesat e sistemeve të mbrojtjes ajrore.
Ai gjithashtu u kërkoi udhëheqësve të G7 që të ndihmojnë Ukrainën të financojë një sistem të mbrojtjes ajrore pasi dhjetëra sulme ruse rrëzuan objektet e energjisë në të gjithë vendin:
“Unë po ju kërkoj të forconi përpjekjet e përgjithshme për të ndihmuar financiarisht në krijimin e një mburoje ajrore për Ukrainën. Miliona njerëz do t’i jenë mirënjohës G7-ës për një ndihmë të tillë.”
Discussion about this post