Ka nisur në Kuvend mbledhja e Këshillit të Legjislacionit për ndryshimet në Kushtetutë, ku po diskutohet për zgjatjen e mandatit të Vettingut, një propozim i bërë nga deputetët e PS.
Në fillim të mbledhjes, kreu i Grupit Parlamentar të PD-së, Alfred Rushaj ka kërkuar shtyrjen e saj dhe marrjen në shqyrtim edhe të kërkesave të demokratëve për ndryshimeve në Kushtetutë më datë 3 nëntor.
“Duke qenë se ligji që ndryshohet, është Kushtetuta, do të duhet të caktojmë relatorët dhe ekspertët për të dy nismat, duke qenë se këto nisma mund apo kanë ndërlidhje me njëra-tjetrën, në sensin që mund të kenë ndikime dispozitat tek njëra-tjetra, dhe duke qenë se në kalendarin tre javor janë parashikuar në një pikë, ajo çfarë ne propozojmë është, të shtyhet kjo mbledhje dhe duke prezumuar i njëjti standard, për njoftimin e nismës në këtë mbledhje të përbashkët, do të ruhet edhe për propozimin e pakicës, pra të opozitës, të bëhet kjo mbledhje e përbashkët më datë 3 nëntor, ku të caktohen relatorët e të dyja palëve për të dy nismat dhe kështu të vijojë në mënyrë të harmonizuar shqyrtimi nëpër komisione”, tha Rushaj.
Kjo kërkesë e Rushaj u kundërshtua nga deputetja socialiste Klotilda Bushka, e cila tha se PD kërkon të shqyrtohen në një ditë tre çështje të ndryshme, gjë që është e pamundur.
“Nisma përfshin një grup të caktuar interesi, ku do të kërkohet dhënia e mendimit të tyre. Kjo nismë do të përcaktojë vlerësimin e domosdoshme të shtyrjes së afateve të institucioneve të Vettingut. Nisma e PD në fakt ka të bëjë me shumë çështje brenda saj që do të kërkojnë më shumë kohë. Vetëm para disa ditësh në lidhje me reformën zgjedhore, kolegët e PD kanë paraqitur një kërkesë për ngritjen e një komisioni të posaçëm për Reformën Zgjedhore. Kërkohet kohë dhe konsultim më i gjatë. Ne propozuam që nismat të shqyrtohen veç e veç dhe jo së bashku”, u shpreh ajo.
Pas përfundimit të fjalës së Enkelejd Alibeaj, deputetët e PD u larguan nga mbledhja dhe e vetmja që qëndroi ishte deputetja e LSI-së, Erisa Xhixho.
