Kryeministri Edi Rama, njëherazi edhe kreu i mazhorancës qeverisëse, ka thirrur një takim informal në një prej resorteve në Shëngjin të Lezhës, ku pritet të përcaktohen prioritetet qeverisëse, por edhe një analizë mbi atë që ka ndodhur në 2023-in.
Takimi po zhvillohet me dyer të mbyllura, por nga raportimet mësohet se Kreu i Qeverisë, ka përjashtuar mundësinë e zgjedhjeve të parakohshme, ndërsa ka kërkuar angazhim maksimal në 2024 për përmbushjen e objektivave dhe përballimin e sfidave.
Duket se 2024-a do të shërbejë për Qeverinë dhe socialistët si një “ndezje motorësh” për fushatën e zgjedhjeve të 2025-ës, përsa kohë Kryeministri ka përjashtuar mundësinë që vendi të shkojë në zgjedhje të parakohshme parlamentare. Sipas raportimeve, në fjalën e tij, Rama është shprehur se nuk ka asnjë arsye që vendi të shkojë në zgjedhje të parakohshme, edhe pse prej disa muajsh Kuvendi zhvillon seanca në kaos, ndërsa skandale të njëpasnjëshme kanë përfshirë emra dhe eksponentë të rëndësishëm të qeverisë.
Rama ka kërkuar, sipas raportimeve një përmirësim të punës nga Komisionet Parlamentare, por edhe nj forcim të strukturave të partisë në bazë, si dhe një angazhim më të madh të deputetëve në zonat që mbulojnë.
Në pjesën e parë të mbledhjes ishte Kryeministri Edi Rama dhe kreu i Grupit Parlamentar, Blendi Ccucci që kanë folur për sfidat dhe prioritetet, ndërsa Kreu i Qeverisë ka vlerësuar parametrat ekonomikë dhe ato të sigurisë.
Takimi do të vijojë në orët e pasdites, ku pritet që ministrat të paraqesin raportet vjetore mbi vitin që lamë pas, ku pritet të vendosin theksin në përmbushjen e objektivave. Takimi do të vijojë edhe ditën e nesërme, ndërsa nuk dihet nëse në përfundim të tij, Kreu i Qeverisë do të ndërmarrë hapa për përmirësimin e kabinetit qeveritar, megjithëse një ditë më parë propozoi Blendi Gonxhen si anëtarin e ri të qeverisë, të cilin e propozoi si ministër të Ekonomisë, Inovacionit dhe Kulturës.
Discussion about this post