Në një intervistë për mediat, analisti Fitim Zekthi gjykon se roli i kryetarëve të Bashkive që do të dalin nga zgjedhjet e 6 Marsit, do të jetë i papërfillshëm, pasi sipas tij ato do të qëndrojnë në detyrë vetëm 1 vit. Zekthi tha se shikon një impenjim shumë të madh nga Shtëpia e Lirisë që sipas tij këto zgjedhje i shikon si një moment vendimtar për qëndrimin e saj në politikë.
“Roli i Kryetarit të Bashkisë do të jetë i papërfillshëm. Nuk do të ketë asgjë në dorë. Do të jetë vetëm 1 vit. Nga pikëpamja e ushtrimit të pushtetit këto janë zgjedhje të parëndësishme. Këto janë zgjedhje që u shpikën për një llogari politike. Nuk shoh një atmosferë të ngarkuar. Shoh një impenjim shumë të madh të Shtëpisë së Lirisë, e cila mesa duket është autorja e prodhimit të kësaj date zgjedhjesh. “Shtëpia e Lirisë” zgjedhjet i shikon si një moment bazik vendimtar për qëndrimin e saj në politikë. Nuk shoh ndonjë tension të madh” – tha Zekthi.
Zekthi më tej tha se nëse “Shtëpia e Lirisë” do të dalë e dyta në këto zgjedhje Lulzim Basha ka humbur legjitimitetin.
“Nëse Shtëpia e Lirisë do të dalë e dyta qartësisht kudo, dhe Basha do të dalë qartësisht duke humbur dukshëm, sigurisht që Basha ka humbur legjitimitetin. Duhet që PD duhet të hyjë në një proces total zgjedhjesh, por megjithatë nuk mendoj se do të ndodh kjo gjë” – u shpreh Zekthi.
Discussion about this post