Komisioni Qendror i Zgjedhjeve ka filluar me procesin e certifikimit të subjekteve politike dhe kandidatëve pjesëmarrës në zgjedhjet lokale të 17 tetorit.
Mediat kosovare, raportojnë se ky institucion mori vendim për certifikimin e 48 subjekteve, prej të cilave 18 parti politike, 1 koalicion, 17 iniciativa qytetare dhe 12 kandidatë të pavarur.
Po ashtu, KQZ-ja vendosi moscertifikimin e dy kandidatëve të pavarur për pjesëmarrje në zgjedhjet për Kuvende Komunale, pasi të njëjtit nuk janë në përputhje me nenin 29 të ligjit për zgjedhjet e përgjithshme.
Numri i përgjithshëm i kandidatëve të certifikuar, që përfaqësojnë këto subjekte politike është rreth 550 kandidatë, prej të cilëve rreth 30 kandidatë për zgjedhjet për Kryetarë të Komunave dhe më shumë se 500 kandidatë për pjesëmarrje në zgjedhjet për Kuvende Komunale.
Në listën e subjekteve politike që certifikohen nga KQZ-ja nuk janë akoma subjektet politike parlamentare dhe kjo pritet të ndodhë në mbledhjet e radhës.
