Ditën e sotme përmbyllet fushata e raundit të dytë të zgjedhjeve lokale në Kosovë. Qytetarët e 21 komunave të dielën e 14 nëntorit do t’iu drejtohen kutive të votimit për të zgjedhur kandidatin e tyre.
Një prej përballjeve më të forta konsiderohet të jetë ajo në kryeqytet, ku gara do të bëhet mes kandidatit të Vetëvendosjes, Arben Vitia dhe atij të Lidhjes Demokratike të Kosovës, Përparim Rama, shkruan Kosova Press.
Në Gjilan në garë janë kandidati i Lidhjes Demokratike të Kosovës, Lutfi Haziri i cili mori 18 mijë e 546 apo 43,51% të votave dhe ai i Vetëvendosjes, Alban Hyseni i cili siguroi 19 mijë e 057 apo 44,71% vota.
Në Podujevë, do të përballet po ashtu kandidati i Vetëvendosjes, Shpejtim Bulliqi 16 mijë e 907 apo 44,16% të votave, kurse ai i Lidhjes Demokratike të Kosovës, Ekrem Hyseni mori besimin e 16 mijë e 925 (44,20%) të qytetarëve.
Po ashtu edhe në Fushë Kosovë në garë janë kandidatët e LDK-së dhe Vetëvendosjes. Kandidati i LDK-së, Burim Berisha në raundin e parë të zgjedhjeve fitoi besimin e 7 mijë e 966 qytetarëve (49,72%), kurse Enver Bajçinca nga VV fitoi 4 mijë 098 vota apo 25,58%.
Në Prizren garojnë Mytaher Haskuka i LVV me 40.41 për qind të votave dhe Shaqir Totaj PDK, me 31.36 për qind të votave në raundin e parë.
Zgjedhje do të ketë edhe në Gjakovë. Qytetarët aty do të mund të zgjedhin mes kandidatit të Aleancës për Ardhmërinë e Kosovës (AAK), Aridan Gjini dhe kandidates së Vetëvendosjes, Mimoza Kusari-Lila. Gjini në raundin e parë fitoi 47.76 përqind të votave dhe Kusar-Lila fitoi 37.20 përqind.
Discussion about this post