E djathta fiton zgjedhjet në Gjermani/ Merz përballet me negociata të vështira për koalicionin e ri

Kancelari i ardhshëm i Gjermanisë, Friedrich Merz, do të fillojë përpjekjet për të formuar një qeveri koalicioni, pasi blloku i tij konservator fitoi zgjedhjet kombëtare, në një garë ku partitë e ekstremit të djathtë dhe të majtë morën mbështetje të konsiderueshme nga votues të pakënaqur.

Merz, i cili nuk ka përvojë të mëparshme në qeverisje, pritet të marrë drejtimin e ekonomisë më të madhe të Europës në një kohë të vështirë, me shoqërinë e ndarë mbi çështjen e migracionit dhe sigurinë e vendit të kapur mes një SHBA-je konfrontuese dhe një Rusi e Kine gjithnjë e më të ashpra.

69-vjeçari përballet me negociata të gjata për krijimin e qeverisë, pasi partia e ekstremit të djathtë Alternativa për Gjermaninë (AfD) arriti një rezultat historik duke dalë forcë e dytë, pas dështimit të koalicionit trepalësh të kancelarit Olaf Scholz.

Në një sinjal të hershëm për orientimin e tij politik, Merz kritikoi ashpër SHBA-në pas fitores, duke e quajtur “të papranueshme” ndërhyrjen e Washingtonit gjatë fushatës, duke e krahasuar atë me ndërhyrjet e Rusisë.

“Për mua, prioritet absolut do të jetë forcimi sa më i shpejtë i Europës, në mënyrë që të arrijmë pavarësi të vërtetë nga SHBA hap pas hapi,” deklaroi ai të dielën.

Blloku konservator CDU/CSU doli forcë e parë me 28.6% të votave, i ndjekur nga AfD me 20.8%, rezultati më i lartë ndonjëherë për këtë parti, sipas rezultateve paraprake.

Megjithatë, partitë kryesore kanë përjashtuar mundësinë e bashkëpunimit me AfD-në, një parti e monitoruar nga shërbimet gjermane të sigurisë për dyshime mbi ekstremizmin e saj, por që ka marrë mbështetje edhe nga figura amerikane si miliarderi Elon Musk.

Kjo do të thotë se Merz do të duhet të negociojë me socialdemokratët e Scholz (SPD) për të formuar qeverinë, në bisedime që pritet të zgjasin me muaj, pas një fushate të ashpër që nxori në pah ndasi të mëdha politike.

Megjithatë, ai nuk do të ketë nevojë për mbështetjen e të Gjelbërve për të siguruar shumicën parlamentare, pasi partia e re BSW, e themeluar nga ish-liderja e së Majtës, Sahra Wagenknecht, nuk arriti pragun 5% për të hyrë në Bundestag.

/Reuters/