Gjykata Supreme ka aprovuar ankesën e Partisë Demokratike të Kosovës, lidhur me vendimin e Panelit Zgjedhor për Ankesa dhe Parashtresa, duke dalë në përfundimin që komuna e Hanit të Elezit të mos shkojë në rivotim.
Zëdhënësi i Komisionit Qendror të Zgjedhjeve, Valmir Elezi, ka deklaruar se pas vendimit të Supremes, do të pritet derisa palët t’i shterojnë mundësitë brenda afateve të përcaktuara ligjore.
“Lidhur me çështjen e komunës së Hanit të Elezit, ne e kemi parë së fundmi vendimin e Gjykatës Supreme duke e kthyer çështjen në PZAP për rivendosje, prandaj, në një situatë të tillë, në Komisionin Qendror të Zgjedhjeve do të presim që palët t’i shterojnë mundësitë brenda afateve të përcaktuara ligjore, para se të bëjmë deklarime dhe njoftime të tjera”, ka deklaruar Elezi.
Elezi tha se KQZ do të shpallë rezultatet përfundimtare të 37 komunave tjera, pasi të përfundojnë të gjitha procedurat.
“Ne jemi të vetëdijshëm se çështja e komunës së Hanit të Elezit është duke u trajtuar në institucionet përkatëse, por meqenëse çdo komunë është një zonë e veçantë zgjedhore, Komisioni Qendror i Zgjedhjeve do të shpallë rezultatet përfundimtare të Zgjedhjeve për Kryetarë të 37 komunave të tjera, pasi të përfundojnë të gjitha procedurat e parapara”, është shprehur Elezi.
Kështu, Gjykata Supreme e Kosovës anuloi vendimin e PZAP-së që Hani i Elezit të shkojë në rivotim.
