Lulzim Basha ka depozituar kërkesën për të kandiduar si kryetar në PD-në zyrtare, në zgjedhjet që do të mbahen më 29 korrik.
Basha e ka depozituar kërkesën pas mbledhjes së Këshillit Kombëtar, ku pavarësisht se merrnin pjesë rreth 30% e numrit të përgjithshëm të anëtarëve, u miratuan procedurat për organizimin e zgjedhjeve.
Komisioni Zgjedhor i ngritur pranë PD-së zyrtare, sipas raportimeve, ka administruar kërkesën e Bashës.
Ish-kryetari i PD-së, i dorëhequr në mars të 2022, kërkon rikthimin në krye të kësaj partie, edhe pse procesi po kontestohet nga shumica e deputetëve që më parë e mbështesnin Bashën.
Rreth një javë më parë, shpalli kandidaturën për kryetar edhe Gjergj Hani.
Ai u shpreh se nevoja e thirri për të kandiduar për kreun e Partisë Demokratike, ndërsa thekson së sot e djathta shqiptare ndodhet në një moment të vështirë.
‘U nisa nga ndjenja e detyrimit jo vetëm karshi eksperiencës sime, por edhe në memorie të shumë atyre që kanë qenë pjesë e jetës sime që sot nuk janë më. Nuk pretonim të kishte një opozitë në gjendje të tillë. Është momenti më i vështirë dhe më i mirë për të djathtën shqiptare që të mund ta kapërcejë dhe të rilindë për atë që është. Këndvështrimi im është konservator!”, tha Hani.
Nuk dihet nëse Bashës dhe Hanit do ti bashkohen emra të tjerë si kandidatë, por duket se linja që mbështet mbajtjen e zgjedhjeve më 29 korrik, po thellon përçarjen me grupin e deputetëve.
Discussion about this post