Në Rrogozhinë do të mbahen nesër zgjedhjet e pjesshme vendore për kryebashkiak, ndërsa garojnë Edison Memolla i PS-së dhe Shkëlqim Hoxha, kandidati i “Bashkë Fitojmë”.
Ndërkohë që ka nisur shpërndarja e materialeve zgjedhore, qytetarët e Rrogozhinës do të mund të votojnë në 54 qendra votimi.
Zgjedhjet e ditës së nesërme janë përsëritje e atyre të 14 majit, pasi Kolegji Zgjedhor pranoi pjesërisht kërkesat e opozitës, lidhur me parregullsitë e evidentuara në procesin e majit.
Kandidati i maxhorancës, Edison Memolla, fitoi zgjedhjet e 14 majit përmes votave të kutisë së burgut.
Ajo që ka rënë në sy përgjatë ditëve të fushatës për zgjedhjet e pjesshme të Rrogozhinës është angazhimi maksimal i Erion Veliajt, kryebashkiak i Tiranës, por edhe drejtues politik i PS-së, dhe pothuajse të gjithë drejtorëve që ai ka në varësi, në krah të kandidatit Memolla.
Në anën tjetër opozita tregohet entuziaste për rezultatin edhe për faktin se ka një rikthim të emigrantëve, që nëse do të votojnë ditën e nesërme, mund të jenë një mbështetje e mirë për kandidatin Hoxha.
Procesi i votimit do të nisë në orën 07:00 dhe qendrat e votimit do të mbyllen në orën 19:00. Rezultati për zgjedhjen e kryebashkiakut pritet të jepet në orët e para të ditës së hënë.
Discussion about this post