Zgjedhjet në Veri të Kosovës, Vuçiç: Nuk do t’i pranojmë kurrë!

Presidenti i Serbisë, Aleksander Vuçiç u shpreh ditën e sotme, se është duke u kërkuar serbëve të ruajnë paqen, para betimit që do të bëjnë katër kryetarët e komunave në veri të Kosovës.

“Ata do të tentojnë të mbajnë seanca konstituive në veri të Mitrovicës, për tri komuna, dhe të zgjedhin kryetarë të rremë, me mbështetje të QUINT-it, të zgjedhur në zgjedhje të rreme”,- u tha Vuçiç, gazetarëve në “Novi Sad”.

Më 23 prill, në komunat veriore të banuara me shumicë serbe, Mitrovicë e Veriut, Zveçan, Leposaviç dhe Zubin Potok, janë mbajtur zgjedhjet e parakohshme, të cilat janë bojkotuar nga popullata lokale serbe. Beogradi zyrtar nuk i njeh rezultatet e këtyre zgjedhjeve, dhe i ka konsideruar “jodemokratike dhe joligjore”. Partia e madhe e serbëve në Kosovë, “Lista Serbe” ka bërë thirrje për bojkotim të këtyre zgjedhjeve. Edhe Beogradi zyrtar e ka mbështetur bojkotin.