Zgjedhjet parlamentare dyditore në Republikën Çeke fillojnë sot, me qendrat e votimit që hapen në orën 14:00. Më shumë se tetë milionë votues me të drejtë vote priten të votojnë deri në mbylljen e votimit nesër.
Sondazhet shohin kryeministrin aktual Andrej Babis në epërsi, por fushata e tij zgjedhore u errësua nga një skandal financiar.
Pas raporteve të kompanive offshore të zbuluara në të ashtuquajturat “Pandora Papers”, 67-vjeçari mohoi të ketë kryer ndonjë veprim të paligjshëm.
Miliarderi Babis drejton partinë populiste ANO.
Pjesa më e madhe e opozitës ka krijuar aleanca elektorale me konservatorët e ”Spolu” (”Së bashku”), aleancën e Partisë Pirate dhe Partisë së Kryetarëve të Bashkive.
Në këtë sfidë elektorale do të garohet për 200 vendet në Dhomën e Deputetëve, dhoma më e rëndësishme e parlamentit.
Në të njëjtën kohë, Republika Çeke po përcakton kursin politik për presidencën e Këshillit të BE-së, të cilin vendi pritet ta marrë në gjysmën e dytë të vitit 2022.
Votimi zhvillohet, ndërsa rriten edhe shqetësimet për shëndetin e presidentit, Milos Zeman.
Presidenti luan një rol të rëndësishëm pas zgjedhjeve parlamentare, pasi ai i jep mandatin për të formuar qeverinë udhëheqësit të partisë më të madhe parlamentare
