Grupi parlamentar i Partisë Socialiste është mbledhur ditën e sotme, ku mësohet se i pranishëm është edhe kryeministri Edi Rama. Ka qenë Taluant Balla ai që ka zbuluar për mediat detaje nga mbledhja e grupit parlamentar të PS.
Sipas tij, është kërkuar që deputetët e PS gjatë fundajës të jenë në terren dhe të vijnë me rezultate konkrete.
“Çdo deputet i PS gjatë fundjavës duhet të jetë prezent në territor dhe për të marrë vendimet që lidhen me angazhimet që lidhen me javën pasardhëse. Në 31 mars është seanca e radhës e Kuvendit, kemi diskutuar për çështjet e rendit të ditës. Po afron dita që në konferencën e kryetareve duhet të ketë një kalendar për zgjedhjen e presidentit. Në mbledhjen e grupit kemi diskutuar se po afron dita që kuvendi duhet të ketë një kalendar që çon në zgjedhjen e presidentit të republikës”, shprehet ndër të tjerash Balla.
Gjithashtu, ai tha se një tjetër sfidë është zgjedhja e presidentit dhe janë kërkuar që deputetët të sjellin kandidaturat më të përshtatshme.
“Jo më vonë se 24 maj duhet të ketë vazhduar procesi i zgjedhjes së presidentit. Kuvendi do marrë kohën e duhur për të zhvilluar këtë proces. PS ka udhëheqësinë e këtij procesi. Do zhvillojë një proces i cili do jetë i hapur konsultimesh brenda suazës së Kuvendit.Tashmë me mua do jetë dhe kolegia Elisa Spiropali dhe Gjiknuri si të mandatuar nga grupi parlamentar për t’u konsultuar me grupet e tjera parlamentare”, ka thënë Balla.
Balla ka thënë se konsultimet brenda grupit parlamentar kanë nisur, duke i kërkuar deputetëve të vijnë me propozime konkrete që të kenë një short listë të atyre që mund të jenë kandidatura të mundshme.
Discussion about this post