Kreu i grupit Parlamentar të PD-së, Gazment Bardhi, komentoi shkresën e kryeministrit Rama drejtuar Presidentit, e cila njofton për vakancën në Bashkinë e Tiranës dhe pesë bashki të tjera. Bardhi tha se Presidenti Bajram Begaj do të veprojë sipas interesit të kryeministrit Edi Rama, çka do të përbënte një shkelje të rëndë të Kushtetutës.
“Presidenti që është autoriteti për të shpallur zgjedhjet duhet të verifikojë procedurën para se të konstatojë ekzistencën e vakancës dhe të dekretojë datën e zgjedhjeve. Nëse vepron ndryshe, do të ishte shkelje e rëndë që sjell përgjegjësi ligjore,” tha Bardhi.
Ai theksoi gjithashtu se Gjykata Kushtetuese, ku Erion Veliaj ka depozituar ankimimin për shkarkimin, duhet të njoftojë pezullimin e vendimit të Këshillit të Ministrave për të shmangur përplasje institucionale. Bardhi ironizoi më tej Begajn, duke thënë se ai ndjek vetëm “urdhrat e Ramës”.
Bardhi shtoi se edhe pse nuk ka interes për fatin e Veliajt, Kushtetuta duhet të respektohet dhe procesi i ankimimit duhet të përfundojë para se të shpallen zgjedhjet.
“Ky është vendim që do e marrin strukturat e PD, kryesia. Uroj shumë që presidenti të respektojë kushtetutën. Di që kërkesa përkatëse, edhe pse kam zero interes për fatin e Veliajt, për mua duhej të ishte shkarkuar shumë kohë më parë, por sa kohë ka një proces që e përshkruan Kushtetuta duhet të respektohet. Besoj se edhe GJK ka rol për të luajtur në këtë drejtim dhe besoj se duhet të njoftojë dhe atë që ka kushtetuta automatike, pezullimin e vendimit të këshillit të ministrave.
Nuk e kam lexuar të plotë përgjigjen e GJK, por procedura e kërkon që në momentin që kërkesa regjistrohet në Gjykatë, automatikisht pezullohet. Në gjykimin tim, edhe për të shmangur një përplasje institucionale, GJK nuk duhet të kursehet vetëm me regjistrimin në regjistër, por duhet të sqarojë se vendimi i Këshillit të Ministrave është pezulluar. Nga Begaj pres ta shpallë Shqipërinë edhe republikë kryeministrore. Ka vetëm një bibël e Kuran që është urdhri i Ramës.”, tha Bardhi.
Discussion about this post