Zgjidhet Drejtori i ri i Policisë së Shtetit, Skënder Hita zëvendëson Ilir Prodën -

Drejtori i ri i Policisë së Shtetit është zgjedhur Skënder Hita. Vendimi është marrë ditën e sotme dhe është dhënë nga Ministri i Brendshëm Besfort Lamallari.

Sipas Lamallarit, ky vendim është marrë mbi bazën e meritës, profesionalizmit dhe integritetit, pas një procesi konkurrues ku Hita është renditur ndër kandidatët më të vlerësuar.

Postimi i Lamallarit:

Sot në mbledhjen e Këshillit të Ministrave miratuam vendimin për dhënien e gradës Drejtues Madhor dhe emërimin e Drejtorit të Përgjithshëm të Policisë së Shtetit, z.Skënder Hita. Ky është një vendim i bazuar në meritë, profesionalizëm dhe integritet. Skënder Hita ka rezultuar ndër kandidatët më të vlerësuar nga një proces konkurrues, duke dëshmuar përvojë të spikatur, vizion të qartë strategjik dhe angazhim të palëkundur ndaj ligjit dhe qytetarëve.

Policia e Shtetit ka një rol kyç në garantimin e rendit dhe sigurisë publike. Prandaj, drejtimi i saj kërkon jo vetëm aftësi profesionale, por edhe ndershmëri, etikë dhe përgjegjësi të lartë publike. Jam i bindur se, nën drejtimin e tij, Policia e Shtetit do të vijojë të forcojë performancën, të rrisë besimin e qytetarëve dhe të përmbushë me përkushtim misionin e saj në shërbim të sigurisë dhe shtetit të së drejtës.

Në 5 vitet e fundit, Hita ka qenë drejtues në qarqet më të vështira në vend, Shkodër, Durrës, Dibër dhe së fundmi në Fier.

Përvoja e tij drejtuese nisi në Shkodër si drejtor i hetimit të krimit, për të vijuar më pas në krye të Policisë së Durrësit. Qark i cili mbetet një nga zonat më sfiduese për shkak të volumit të lartë të mallrave në portin më të madh të vendit dhe aktivitetit të dendur ekonomik.

Gjatë kësaj periudhe, nën drejtimin e tij spikat zbërthimi i dëshmisë së vëllezërve Beqiraj që hodhi dritë mbi vrasje me pagesë në Durrës dhe Tiranë. Pas këtyre sukseseve operacionale, Hita mori drejtimin e Policisë së Fierit, një tjetër qark me rëndësi të veçantë për sigurinë kombëtare.

Megjithatë, kjo fazë e karrierës së tij u shoqërua me polemika të forta, pasi gjatë zgjedhjeve parlamentare ai u akuzua publikisht nga opozita për lidhje me grupe kriminale. Pavarësisht këtyre akuzave, profili i tij mbetet i lidhur ngushtë me menaxhimin e situatave të vështira në pikat më të nxehta të kriminalitetit në vend.

Kujtojmë se gara për Postin e Drejtorit të Përgjithshëm të Policisë së Shtetit u hap më 1 mars, pas largimit të Ilir Prodës nga drejtimi i Policisë.

Pas filtrit të aplikimeve dhe verifikimeve ligjore, në Ministrinë e Brendshme u zhvillua “testi final” për 14 kandidatët e mbetur në garë. Dy aplikante gra u skualifikuan që në nisje, pasi ligji kërkon që kandidatët të jenë pjesë e strukturave të policisë. Ndërkohë kandidatët e tjerë në garë bashkë me Hitën ishin: