I keni parë ato njoftimet që vendosen në hyrje pallatesh ose nëpër shtylla, ku shkruhet “Bëjmë zhbllokime pusetash, lavamanë, etj….”. Lali Eri e ka “kopjuar” idenë dhe ka krijuar një tender të madh për zhbllokimin e pusetave të gjithë Tiranës. Projekti është serioz dhe kushton 240 milionë lekë të taksapaguesve të kryeqytetit.
Kështu, Bashkia e Tiranës përmes Ujësjellës Kanalizimeve ka shpallur një tender për hapjen dhe zhbllokimin e pusetave. E çuditshme të bësh tender për një punë që është detyra e Ujësjellësit dhe paguhet çdo muaj nga familjet si tarifë për largimin e ujërave. Kjo bëhet përmes faturës së ujit në sportelet e UKT-së.
Ky është një fond që i falet një kompanie me një kontratë që zgjat një vit dhe nuk dihet se sa puseta do të zhbllokohen dhe sa kushton puna për hapjen e secilës.
Tenderi jepet pa garë
Por le të kthehemi tek tenderi i organizuar për këtë qëllim. Nëse do të kishte një prokurim të rregullt, pjesëmarrja do të ishte e lartë për këtë punë publike, pasi ka shumë firma të specializuara dhe fuqi punëtore për ta bërë këtë punë.
Por, si në shumicën dërrmuese të tenderëve, Lali Eri ka zgjedhur t’i japë këto lekë pa konkurrencë, pra t’ia falë kompanisë së paracaktuar.
Tenderi u shpall më 34 korrik 2023 dhe u mbyll më 9 gusht 2023. Në prokurim u administrua vetëm një ofertë, ajo e bashkimit të operatorëve: Onix Shpk me pronar Sahit Dollapin dhe Mane/S shpk me pronar Bledar Manen.
Pa u vonuar, më 21 gusht 2023, vartësit e Erin Veliajt në UKT kanë shpallur fituesin. Fondi limit për këtë punë publike është 19 999 475,00 lekë, por Sahit Dollapi ka vënë dorën në zemër dhe ka ofruar ta kryejë zhbllokimin e pusetave me çmimin 18 822 000,00 lekë. Nëse do t’i shtojmë TVSH-në, vlera e kontratës shkon mbi 240 milionë lekë.
Meqenëse tenderi i prokuruar pa konkurrencë ka risk të lartë korrupsioni nga zyrtarët me fondin limit, siç duket më sipër, Open Data e ka vlerësuar me “Flamur të kuq”.
Dollapi e merr çdo vit këtë tender
Ky është një tender i shpikur nga Lali Eri dhe PS për të shpërblyer Sahit Dollapin pas dorëheqjes si sekretar i PD-së në vitin 2019. Dy muaj pas dorëheqjes nga posti i Sekretarit Organizativ në PD, Sahit Dollapi ka fituar një tender të majmë nga Ujësjellës Kanalizime Tiranë, një institucion në varësi direkt nga Erion Veliajt.
Tenderi i porositur për Sahit Dollapin dhe kompaninë e tij “ONYX”sh.p.k kishte për objekt: “Hapje, zhbllokim pusetash”.
Fondi për këtë tender ishte 19.993.590 lekë. Pra, nuk ka ndryshuar vlera nga tenderi i sivjetmë, ndërkohë që Lali Eri ka rritur fondin prokuruar për kapakë pusetash. Në të njëjtën kohë, Veliaj më 18 korrik 2023 hapte tenderin e radhës 500 mln lekë për kapakë pusetash.
Për vite me radhë, Dollapi ka qenë në postet drejtuese të PD-së, ndërkohë ka qenë drejtor edhe kur PD-ja ishte në pushtet.
Përgjatë tetë viteve të qeverisë së djathtë, si një prej njerëzve më të besuar të Sali Berishës, Sahit Dollapi mbajti tre pozicione kyçe, atë të drejtorit të përgjithshëm të KESH, të Ujësjellës Kanalizimeve Tiranë dhe pas largimit të çekëve, edhe pozicionin e administratorit të përgjithshëm të CEZ.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post