Një zjarr i fuqishëm ka përfshirë lagjen Vullnetari “Vullnetari” në Elbasan, ndërkohë që është riaktivizuar zjarri në fshatin Mjeshovë në Beratit, e cila ndodhet në kufi me Mallakastrën.
Sa i përket zjarrit në Elbasan, burimet nga zjarrfikëset bënë me dije se zjarri është aktivizuar në orët e vona të së dielës në një zonë kodrinore, ngjitur me një zonë, e cila njihet për ullinj shekullorë.
Ndërkohë, flakët janë përhapur me shpejtësi, duke rrezikuar dhe disa banesa. Po ashtu, flakët vunë në rrezik depot e ujit të pijshëm. Menjëherë, në vendin e ngjarjes kanë shkuar forcat zjarrfikëse dhe të policisë, të cilat po punojnë për shuarjen e flakëve.
Vetëm pak minuta pas zjarrit në Elbasan, nga Berati u raportua riaktivizimi i zjarrit në zonën e pyllëzuar të Mjeshovës në Berat. Efektivët e Repartit Zjarrfikës kanë vijuar për 24 orë pa ndërprerje punën duke luftuar me flakët në një terren tepër të vështirë, ku është e pamundur ndërhyrja në zonë me mjete, ndërkohë që është kërkuar edhe ndihma e Reparteve Zjarrfikëse të Mallakastrës. Edhe pse i fikur prej 24-orësh, vatrat e zjarrit janë riaktivizuar nga era, duke përfshirë sipërfaqe të tëra me pisha e shkurre. Deri më tani mësohet se janë shkrumbuar rreth 6 ha me pisha e shkurre në zonën më të gjelbëruar të malit Shpirag. Burimet policore bëjnë me dije se zjarret në këtë zonë kanë qenë të qëllimshëm dhe po punohet për identifikimin dhe kapjen e autorëve.
