Zjarr në Syrin e Kaltër, digjen 4 kioska, flakët shuhen pas dy orësh

Një zjarr ka rënë pak pas mesnatës në hyrje të Syrit të Kaltër, në territorin e bashkisë Finiq.

Si pasojë e flakëve janë djegur katër kioska tregtimi në pronësi private, të cilat ndodheshin në hyrje të zonës turistike.

Pas marrjes së njoftimit për zjarrin, në vendngjarje mbërritën tre mjete zjarrfikëse, dy automjete policie dhe forca policore.

Për rreth dy orë, ekipet e zjarrfikësve kanë luftuar me flakët, duke bërë të mundur shuarjen e plotë të zjarrit rreth orës 02:00.

Nga hetimet paraprake dyshohet se shkak i rënies së zjarrit ka qenë një defekt elektrik.

Autoritetet vijojnë hetimet për të përcaktuar rrethanat e plota të ngjarjes dhe shkakun e saktë të zjarrit.