Tymi ka mbuluar qytetin e Laçit, që prej orëve të para të mbrëmjes së djeshme. Kjo situatë ka ardhur si pasojë e djegies së mbetjeve urbane të qytetit të Laçit të cilat grumbullohen në periferi të qytetit. Retë e tymit kanë pushtuar qytetit e Laçit, pasi janë përhapur n gjithë qytetin madje edhe në disa fshatra të zonës së Kurbinit.
Por, mëngjesin e sotëm kryeministri Edi Rama ka publikuar pamjet nga qyteti i Laçit duke treguar “Rilindjen” në këtë qytet, por në fakt realiteti me të cilin përballen qytetarët është krejt tjetër, pasi këta të fundit zgjohen nën pushtimin e tymit.
Djegia e plehrave në qytete të ndryshme është kthyer në një fenomen shqetësues, ku dyshimet janë se ky akt kryhet pikërisht për të përthithur fonde nga qeveria për menaxhimin e mbetjeve.
Situata të tilla janë vënë re muajt e fundit në disa bashki si Durrës, Shijak, Kavajë, etj, ndërsa tani duket se radhën e ka Kurbini.
Pamjet që ka siguruar Gijotina.com tregojnë qartë situatën e krijuar në qytet.
Për normalizimin e situatës është dashur ndërhyrja e fadromave, por edhe forcave zjarrfikëse të qytetit të Laçit.
Ndërsa, një tjetër fakt skandaloz është se prej vitesh mbetjet urbane të Laçit grumbullohen pranë rrugës së Kishës së Shën Ndout. Në të shumtën e rasteve, plehrat sjellin probleme qoftë nga era e rëndë, por edhe situata e krijuar nga djegia e tyre.
Ky nuk është një shqetësim vetëm për banorët e Laçit, por edhe pelegrinët që vizitojnë Kishën në kodrat e qytetit.
Kjo situatë është përsëritur disa herë në qytetin e Laçit ku edhe pse vazhdimisht ka pasur ndërhyrje nga zjarrfikëset për të shuar flakët, situata vazhdon të jetë e njëjtë, pasi ndërgjegjësimi i banorëve duket se është mjaft i ultë.
