Zjarret në Delvinë dhe Dropull i afrohen fshatrave, në Dhuvjan nuk mund të futen makinat zjarrfikëse

Zjarri që mbërriti tre ditë më parë nga Delvina në Dropull po zbret në lartësinë rreth 300 metra nga disa fshatra.

Vatra më aktive është ajo pranë fshatit Dhuvjan që deri tani po mbahet nën kontroll vetëm me ndërhyrjen e zjarrfikësve me mjete rrethanore pasi terreni nuk mundëson ngjitjen e mjeteve.

Zjarrfikës të Dropullit dhe Gjirokastrës po përpiqen të pengojnë depërtimin e tij drejt banesave.

Ndërkohë, pasdite një shi lokal që zgjati për rreth 15 minuta ndihmoi situatën edhe përgjatë shtrirjes horizontale të brezit të zjarrit.

Zjarret në Dropull që kanë nisur rreth tri javë më parë kanë djegur sipërfaqe të jashtëzakonshme me kullotë, pyll pishe, bredhi, pemësh frutorë dhe zjarret që kanë zbritur në luginë kanë dëmtuar edhe kultura të drithërave dhe dhjetëra pemë dekorative.

Të kërcënuara janë pas çdo situate edhe një numër momumentesh kulture kryesisht kisha dhe manastrire mesjetare që gjenden në lartësitë rreth 500-600 m mbi fshatrat e Dropullit.