Zjarrfikësit në Greqi luftuan me zjarret që vazhdojnë për dhjetë ditë me radhë në ishullin Rodos, ndërsa vatra të reja shpërthyen në mbarë vendin.
Këto zjarre shkatërruan ferma dhe fabrika gjatë natës dhe ndërsa fermerët nxituan të shpëtonin kafshët e tyre.
Zjarret në të gjithë Greqinë, të cilat janë shtuar nga erërat e forta dhe temperaturat që kalojnë 40 Celsius, vranë dy persona të tjer më 26 korrik, duke e çuar numrin e të vdekurve nga zjarret në gjithsej pesë.
Zyrtarët urdhëruan evakuimin e disa komuniteteve në zonën Magnesia, një zonë bregdetare në veri të Athinës e goditur rëndë nga zjarret.
Trupi i një bariu 45-vjeçar është gjetur në një zonë rurale mbrëmjen e së mërkurës, tha një zjarrfikës. Më herët, autoritetet kishin gjetur trupin e një gruaje, tha televizioni shtetëror ERT. Të dyja këto vdekje i atribuohen zjarreve.
Një zjarr tjetër shpërtheu pranë qytetit të Lamias, në jug të Volos. Banorëve të disa vendbanimeve u është thënë të largohen nga shtëpitë e tyre.
Zjarrfikësit po tentojnë të shuajnë edhe një zjarr tjetër në ishullin Evia, ku dy pilotë u vranë të martën teksa avioni i tyre u rrëzua në një kodër ndërsa po hidhte ujë mbi flakët.
Zona të shumta në Mesdhe janë kapluar nga një valë e të nxehtit të verës në ditët e fundit dhe zjarrfikësit po luftojnë për t’i shuar zjarret në të gjithë rajonin, nga Portugalia në Sicili e deri në Algjeri.
Zjarret të tilla janë të shpeshta në Greqi gjatë verës, por temperaturat më të larta, si dhe moti i thatë, të cilat shkencëtarët ua atribuojnë ndryshimeve klimatike, e kanë kthyer vendin në një pikë të nxehtë mesdhetare.
Brigada e zjarrfikësve tha se më shumë se 500 zjarre janë aktivizuar në Greqi deri më tani. Në Rodos, aty ku më shumë se 20.000 vizitorë të huaj dhe vendas u larguan nga hotelet dhe shtëpitë buzë detit gjatë fundjavës, zjarret kanë filluar të shuhen.
Rreziku nga zjarret mbetet “ekstrem” për disa zona të Greqisë, tha brigada e zjarrfikësve./ REL
Discussion about this post