Situata nga zjarri në Njësinë Administrative Ulëz, në Bashkinë Mat, vijon të mbetet kritike prej katër ditësh, ndërsa flakët janë përhapur në një sipërfaqe të konsiderueshme pyjore.
Zjarri ka përfshirë qindra hektarë me pisha, dushqe dhe bimësi të tjera, duke u shtrirë në zonat e Lundrës, Trodhenës dhe Madheshit.
Flakët kanë dalë jashtë kontrollit dhe po përparojnë me shpejtësi. Tymi i dendur dhe intensiteti i zjarrit po vështirësojnë ndërhyrjen e forcave nga toka.
Gjatë mbrëmjes së kaluar, për shkak të afrimit të flakëve, disa familje në Madhesh janë evakuuar. Zjarri ka rrezikuar gjithashtu banesa dhe stane me bagëti në zonë.
Këtë të mërkurë, forca të shumta janë nisur drejt Madheshit, me synim izolimin e vatrave dhe pengimin e përhapjes së mëtejshme të flakëve.
Në operacion janë angazhuar punonjës të Bashkisë Mat, zjarrfikës, efektivë të shërbimit pyjor dhe forca të ushtrisë, të cilët prej katër ditësh po punojnë për vënien nën kontroll të zjarrit.
Ndërhyrja po kryhet edhe nga ajri. Një helikopter është angazhuar prej tre ditësh në operacionin për shuarjen e flakëve.
Situata në zonë mbetet kritike, ndërsa operacioni për izolimin dhe shuarjen e vatrave të zjarrit vijon.
Discussion about this post