Një fabrikë bojrash përfshi nga flakët mbrëmjen e së shtunës, ndërsa policia bllokoi për disa orë qarkullimin e automjeteve në aksin Tiranë-Durrës dhe evakuoi banorët e zonës, banesat e të cilëve ishin pranë fabrikës.
Zjarri i përmasave të mëdha ka zgjatur për disa orë, ndërsa sot Policia ka nisur hetimet lidhur me atë se çfarë shkaktoi flakët.
Sipas raportimeve, në fabrikë, në momentin kur ka rënë zjarri, rreth orës 22:30, nuk ka pasur punëtorë, ndërsa alarmi është dhënë nga një prej rojeve.
Në dëshminë e tij, sipas raportimeve, para policisë, roja ka thënë se flakët kanë nisur në ambientet e brendshme të fabrikës.
Nisur nga kjo dëshmi, por edhe hetimet e kryera, dyshohet se shkak për zjarrin ishte një shkëndijë elektrike.
Lëndët kimike që ndodheshin brenda fabrikës si lëndë e parë për prodhimin e bojërave kanë ndihmuar që zjarri të përhapej.
Ekipeve zjarrfikëse nga Tirana dhe Durrësi i janë dashur më shumë se 4 orë për të shuar flakët, ndërsa nuk dihet ende se çfarë ndikimi në mjedis ka pasur djegia e lëndëve kimike, edhe pse u raportua se ekipe mjedisore kanë nisur matjet.
Discussion about this post