Në kulmin e sezonit turistik, që prej mesditës së djeshme, (25korrik) fusha e mbetjeve në Vlorë vijon të jetë e përfshirë nga flakët. Si pasojë e djegies së mbetjeve, tymi i madh në formë reje është përhapur në të gjithë qytetin, duke krijuar shqetësime tek pushuesit.
Flaka ka vijuar për gjatë gjithë natës, por megjithëse mjetet e bashkisë kanë qenë prezentë, ende nuk është bërë e mundur shuarja e zjarrit. Mbi qytetin bregdetar ku shihet qartë ndotja e krijuar si pasojë e djegies së mbeturinave.
Flakët kanë përshkuar pothuajse të gjithë fushën e mbetjeve urbane, e cila ndodhet në zonë të banuar, në lagjen 24 Maji, njohur si ish-Fusha e Aviacionit. Ndërkohë tymi është shqetësues jo vetëm për ata që kanë banesat pranë, por për të gjithë qytetarët e Vlorës, pasi era era fryn nga verilindja. Shkaqet e rënies së zjarrit nuk dihen ende, teksa nuk përjashtohet fakti se zjarri mund të jetë i qëllimshëm.
Në terren janë dy fadroma dhe një kamion i bashkisë që hedhin dhera për të izoluar vatrat. Për shkak të situatës së rënduar është kërkuar ndihmë nga Forcat e Armatosura të cilat mbërritën në Vlorë rreth mesdites.
Duhet theksuar se vendgrumbullimi i mbetjeve urbane në Vlorë nuk plotëson asnjë standard. Nga ana tjeter, landfilli i Sherishtës, ndërtuar nga kompania e inceneratorëve, nën hetim nga SPAK, ende nuk është vendosur në funksion edhe pse zyrtarë lokalë patën deklaruar, muaj më parë, se “është shkëputur kontrata me subjektin privat dhe Sherishta ka kaluar në pronësi të bashkisë”.
Kryetari i Bashkisë së Vlorës, Ermal Dredha ka folur mbi situatën e zjarrit në fushën e mbetjeve. Zjarri prej te enjtes paradite vijon në vendgrumbullim ndërsa sipas kryetarit të bashkisë të gjitha mjetet dhe forcat njerëzore janë në gatishmëri dhe punë, por era e fortë ka krijuar përhapjen e tymit. Veç tyre ndihme ka patur edhe nga ministria e mbrojtjes, nga biznesi apo edhe mjete të aeroportit.
“Zjarri është vendosur nga dora e njeriut, e qëllimshme apo jo nuk mund ta themi. Por është dore njeriu pas zjarrit. Pasi me parë kemi patur temperatura edhe më të larta dhe nuk kemi pasur situatë”, tha Dredha.
Në fjalën e tij Dredha kërkoi edhe ndihmën e organeve ligjzbatuese për të vënë para përgjegjësisë personat që shkaktojnë situata zjarresh.
Dredha ka folur edhe mbi landfildin e Sherishtes, për të cilin tashme është firmosur një vendim që i kalon ministrisë së Mjedisit dhe agjencinë përkatëse (AKEM) dhe për rrjedhoje lidhet një kontratë me Bashkinë e Vlorës mbi përfundimin e punimeve dhe i jep bashkisë se Vlorës nen administrim këtë landfild. Dredha konfirmon se shpreson që gjithçka te mbyllet sa më shpejt, por edhe të nisë projekti i kapsulimit.
Dredha ka theksuar se flotës se zjarrfikëses së Vlorës do t’i shtohet një tjetër mjet ndërsa situata ka qenë e vështirë edhe për shkak të erës.
Discussion about this post