Rëndohet bilanci i tragjedisë së ndodhur në qytetin spanjoll Murcia, ku zjarri i rënë rreth orës 06:00 të mëngjesit shkrumboi klubin e natës “Teatre”.
Ekipet e shpëtimit janë ende në kërkim të personave të zhdukur pas zjarrit, që ka djegur sipas raportimeve tre klube nate që ndodheshin ngjitur me njëri-tjetrin.
Katër persona kanë mbetur të plagosur, ndërsa shërbimet e urgjencës në Murcia thonë se numri i të vdekurve mund të rritet, ndërsa deri në mesditë numërohen 13 viktima.
Diego Seral nga Policia Kombëtare e Spanjës u tha gazetarëve se rrënimi i godinës nga flakët po e bënte të vështirë gjetjen e viktimave dhe është e pamundur të përcaktohet bilanci i zjarrit.
“Identifikimi i trupave do të marrë kohë”, tha ai.
Ndërkohë, jashtë diskotekës së njohur të rinj të përqafuar dhe me lot në sy nga tronditja që kanë pësuar presin të marrin informacion për të zhdukurit.
“Dolëm nga diskoteka 30 sekonda deri në 1 minutë përpara se të fikeshin alarmet dhe të gjitha dritat, ndërsa nga britmat kuptohej se kishte rënë zjarr. Pesë anëtarë të familjes dhe dy miq të mitë janë të zhdukur“, tha një i mbijetuar.
Një zëdhënëse e klubit të natës “Teatre”, u tha gazetarëve se zjarri fillimisht ka nisur në diskotekën ngjitur me ta, “La Fonda” dhe ka përfshirë më pas dy klubet e tjera teksa në ambientet e tyre po zhvilloheshin disa festa ditëlindjesh.
Discussion about this post