Një zjarr masiv ka përfshirë katin e katërt të një pallati paraditen e kësaj të hëne tek zona e “Komunës së Parisit” në kryeqytet.
Ngjarja ka ndodhur rreth orës 11:05 në rrugën “Tish Daija” në kompleksin e banimit “Kika2”, teksa ambientet që u përfshinë nga flakët shërbenin si zyra për bankën e nivelit të dytë “Raiffaisen Bank”.
Siç shihet edhe nga pamjet e mëposhtme shtëllynga të mëdha tymi përfshinë zonën, duke shkaktuar panik, jo vetëm tek banorët që banin në pallatin e përfshirë nga zjarri, por edhe tek qytetarët e tjerë.
Burime bëjnë me dije se fillimisht punëtorët dhe qytetarët nuk e kishin kuptuar se kishte rënë zjarr, pasi alarmi nuk kishte punuar dhe shumë prej tyre kanë mbetur brenda.
Është dashur ndërhyrje e efektivëve të zjarrifkësve për të bërë të mundur evakuimin e plotë të të gjithë banorëve nga pallati. Ndërkohë, për vënien në kontroll të flakëve dhe shuarjen e tyre, forcat zjarrfikëse kanë punuar për rreth 1 orë e gjysmë.
Flakët janë përhapur përmes tubave të aspirimit, ndërsa një zyrë e “Raiffaisen Bank” ka pësuar dëme të mëdha dhe është shkrumbuar plotësisht.
Nga hetimet paraprake dyshohet se shkak për rënien e zjarrit është bërë një shkëndijë në paketën elektrike të një zyre që ndodhej në pallat, gjithsesi, do të jetë ekspertiza ajo që do të bardhë shkakun e saktë.
Drejtori i Shërbimit Zjarrfikës, Shkëlqim Goxhaj, në një prononcim për mediat në lidhje me ngjarjen në fjalë tha se dëmtohet e plota do të konfirmohen pas kryerjes së analizës, teksa konfirmoi shkrumbimin e zyrës së “Raiffaisen Bank” dhe pajisjeve të aspirimit në pallat.
“Për momentin e dëmtuar është zyra dhe pajisjet e aspirimit të kateve të tjera më lart. Ka patur qytetarë që kanë qenë të bllokuar në ambientet brenda objektit, kanë qenë forcat e shërbimit zjarrfikës të cilat u kanë hapur korridor dhe kanë bërë evakuimin e tyre. Fillimisht kishim prioritet evakuimin, pasi kryesore ishte shpëtimi i qytetarëve. Deri tani nuk kemi informacion as për qytetarë të dëmtuar dhe as për të asfiksuar.” – tha ai.
Dyshohet se zjarri u përhap edhe në tre katet e mësipërme, përveç zyrës së “Raiffaisen Bank” në katin e katërt. Grupi Hetimor po punon për përcaktimin e saktë të shkakut të rënies së zjarrit.
Discussion about this post