Kryeministri i Maqedonisë së Veriut, Zoran Zaev deklaroi sot se shteti është në gjendje të qëndrueshme nga ana financiare dhe se autoritete janë të gatshme të intervenojnë në rast se vazhdon rritja e inflacionit në vend.
Zaev tha se në rast se është nevoja, ekzekutivi do të aktivizojë edhe rezervat shtetërore, për t’i ardhur në ndihmë qytetarëve.
“Ashtu siç njoftuan edhe disa ministra, Qeveria gjithashtu me rezervat shtetërore gjithmonë është e gatshme që të intervenojë, nëse shohim se ndonjë cikël tregon pikun, që do të kishte ndikim në ekonominë në përgjithësi, sidomos në produktet bazë. Këtu flas për, vajin, miellin, qumështin, vezët dhe gjithçka që bën pjesë në shportën familjare”, deklaroi Zaev.
Banka Popullore dje njoftoi se do ta rishikojë normën e inflacionit dhe do ta rrisë atë nga 2.2 për qind e parashikuar deri më tani. Megjithatë, Banka Popullore thotë se rritja e çmimeve do të jetë e mesatare dhe nuk do të ketë ndikim të madh në çmimet përfundimtare dhe konsumatorët.
Edhe më herët, Zaev deklaroi se qytetarët nuk duhet të shqetësohen për rritjen e çmimit të energjisë elektrike, pasi masat e ndërmarra nga qeveria do të sigurojnë çmime të qëndrueshme.
