Kriza financiare e Barcelonës ka futur në një ngërç të madh skuadrën e cila zhvilloi një merkato shumë të dobët dhe mbi të gjitha solli largimin e Lionel Messit.
Zëvendës presidenti aktual, Rafa Juste ka analizuar situatën aktuale financiare teksa ka thumbur paraardhësit e tyre.
“Që nga ky moment e deri në vitin e ardhshëm do të shohim se si do të jetë situata dhe çfarë do të kemi në dispozicion për blerjet. Si fillim duhet të vendosim themelet në një shtëpi që e kemi gjetur të shkatërruar, ndaj do të përqendrohemi fillimisht për ta përforcuar e pastaj për ta zgjeruar.
E them këtë pa humbur nga sytë faktin se duam të jemi më të mirët dhe Haland është një ndër më të mirët në botë. E kanë thënë edhe presidenti dhe administratori i deleguar që në mandatin e mëparshëm që ka qenë shkatërrimtar, kanë blerë lojtarë pa e ditur nëse mund t’i paguanin dhe nuk kanë bërë asgjë tjetër veçse kanë shtuar borxhet, përtej rrogës së lartë që gjetëm”, tha Juste në rolin e zv.presidentit të klubit.
