Organizata Botërore e Shëndetësisë (OBSH) ka shpallur zyrtarisht përfundimin e epidemisë së hantavirusit që shpërtheu në anijen turistike MV Hondius, pasi pacienti i fundit i ekspozuar përfundoi me sukses periudhën 42-ditore të monitorimit dhe rezultoi negativ në analizat laboratorike.
Epidemia, e cila u raportua për herë të parë në muajin maj, infektoi gjithsej 13 persona dhe shkaktoi tre viktima. Që prej 25 majit nuk është regjistruar asnjë rast i ri, duke i hapur rrugë shpalljes së fundit të shpërthimit.
Gjatë menaxhimit të situatës, autoritetet shëndetësore gjurmuan dhe monitoruan mbi 650 kontakte në 33 vende dhe territore, në një operacion të gjerë ndërkombëtar për të parandaluar përhapjen e virusit.
Megjithatë, OBSH thekson se virusi Andes dhe lloje të tjera të hantavirusit vazhdojnë të përbëjnë rrezik në Amerikën e Jugut dhe në zona të tjera ku janë endemike, duke kërkuar monitorim të vazhdueshëm dhe gatishmëri të lartë.
Ndërkohë, është në zhvillim një studim ndërkombëtar me pjesëmarrjen e 21 vendeve, i cili synon përmirësimin e diagnostikimit, trajtimeve dhe zhvillimin e vaksinave të mundshme kundër hantavirusit.
Anija MV Hondius ishte nisur nga Ushuaia e Argjentinës më 1 prill dhe besohet se infektimet lidhen me ekspozimin në rajonin e Patagonisë, ku varianti Andes është endemik. Pas disa javësh izolimi në det, anija u lejua të ankorohej në Tenerife të Spanjës më 9 maj, ndërsa pasagjerët u kthyen më pas në vendet e tyre.
Discussion about this post