Kur vjen puna tek promovimi i pikave turistike të Shqipërisë, qeveria është e para që vepron me propagandën e saj dhe reklamat. Por qytetarët të cilët zgjedhin të vizitojnë perlat e vendit tonë tregojnë prapaskena që “i nxjerrin zbuluar”. Syri i Kaltër është destinacioni që ofron peizazh mbresëlënës të natyrës. Disa turistë francezë dhe gjermanë zgjodhën ta vizitonin por mesa duket nuk ngelën të kënaqur nga investimet që janë bërë në këtë pikë turistike.
Atyre u duhej të ecnin rreth 1.5 km në këmbë nga rruga kryesore tek Syri i Kaltër, pasi automjetet nuk lejohen të hyjnë më në Park. Madje ka edhe nga ata të cilët janë me aftësi të kufizuar, ku pakënaqësia ndaj mungesës së investimeve për këta miq të huaj bëhet akoma më shqetësuese.
Atyre u është dashur të ecin në sfidë me temperaturat përvëluese ndërsa thonë se zyrtarët duhet të mendojë për transport alternativ. Teksa lëviz me ndihmën e patericës, ai thotë se nuk gjeti mirëkuptim për shkuar tek Syri i Kaltër me makinë.
“U tregova për paaftësinë time dhe refuzuan që të hyja me mjet këtu. Do ti shkruaj kryeministrit, ministres të kulturës, të japin një shpjegim sesi do të hyjnë personat me paaftësi si unë. M’u desh të bëja 2 km për të ardhur e 2 km për të ikur me patericë. Duhet të organizojnë transport për të paaftët që nga hyrja e deri në vend. Kam ardhur nga Franca të vizitoj Shqipërinë. Ne po investojmë për Shqipërinë, po Shqipëria pse nuk investon për ne?!”, thotë ai.
Edhe dy turistë nga Spanja, sado që u kënaqën duke vizituar Syrin e Kaltër, kur u kthyen përmendën vështirësitë, që hasën gjatë rrugëtimit. Madje sugjerojnë disa mënyra transporti.
“Vend shumë i bukur, por është shumë e vështirë, shumë e dhimbshme të ngjitesh edhe të kthehesh sërish pa transport. Do të ishte shumë mirë një tren turistik, disa biçikleta ose patina diçka për të lehtësuar turistët. Hodha ujë në kokë sepse është shumë vapë. Është e vështirë për të ardhur te Syri i Kaltër, mbase për të rinjtë është më e lehtë”, thotë gruaja nga Spanja.
“Më duket shumë bukur këtu, mendoj se është një nga vendet më të bukurat në Shqipëri, nuk kam parë ujë aq të kthjellët në jetën time. Është super, super, super bukur, por ndihem i lodhur bën edhe shumë vapë, është rrugë e gjatë”, shton turisti spanjoll.
Ndërsa ky çift nga Gjermania mendon se duhet të kishte një rrugë alternative.
“Për të arritur deri tek Syri i Kaltër duhet të ishte një rrugë përmes pemëve. Duhet të ketë një mënyrë, që ti çoj turistët direkt tek Syri i Kaltër, për ata që nuk mund të ecin dot gjatë, për ata që duan të ecin asfalti është në rregull”, thonë ata.
Sakaq ka edhe nga ata turistë vendas apo banorë pranë kësaj pike të cilët stërmundohen me prindërit dhe fëmijët e vegjël për të arritur në destinacion, mes temperaturave përvëluese.
Discussion about this post